Пливањето како спорт повторно ќе заживее во Струга преку реконструкцијата на руинираниот затворен пливачки базен, најави денеска на прес-конференција кандидатот за градоначалник на Струга од коалицијата „Заедно за Струга“, Владимир Кочоски.
Според него, со самата реконструкција на базенот, кој не е во функција од 2002 година, повторно ќе се создадат услови пливањето во градот да се врати на патеките каде што беше пред неколку години.
– Младите пливачи ги одржуваат своите активности само во летните месеци – јуни, јули и август, кога се врши обука на над 100 деца како пливачи, така и непливачи. Интересот на стружани за овој спорт е огромен и затоа еден од врвните приоритети што ќе ги направиме во соработка со Владата е на ова место да му го вратиме сјајот, детскиот џагор и конечно пливањето како спорт повторно да заживее во Струга, истакна Кочоски.
Со тоа, додаде Кочоски, струшките пливачи повторно ќе бидат учесници на европски првенства, балканијади и разни меѓународни натпревари.
Согласно неговата програма, во наредните четири години вети изградба и на други спорстски објекти.
– Согласно програмата во следните четири години ќе изградиме едно повеќенаменско спортско игралиште кое ќе им биде на располагање на сите граѓани за спортување, рекреирање и за натпреварување. Ќе ги изградиме тениските терени за младите тениски таленти, нудиме изградба на повеќенаменско игралиште за ракомет, одбојка и фудбал на песок, а ќе го поддржиме и проектот „Спортско лето – Спорт за сите“ во соработка со Агенцијата за млади и спорт, рече Кочоски.