Општата болница Кочани годинава ќе има за 3 милиони денари поголем буџет од претходната. Ланската година изнесуваше 113 милиони, а годинава Министерството за здравство на кочанската болница и одобри вкупен буџет од 116 милиони денари. Средствата главно ќе бидат искористени за реконструкција на болничките одделенија, како и за набавка на нови апарати. Од овој месец се воведе и нова дијагностичка метода во лабораторија.
– Во декември 2016 година завршивме со комплетна реконструкција на болничките соби на интерно одделение, ги обновивме подовите во хируршката амбуланта и хируршката операциска сала, а годинава приоритет ќе дадеме на другите одделенија. Од овој месец воведовме и нова дијагностичка метода. Станува збор за алерго тестови кои што ќе се работат во нашата лабораторија, а ќе го адаптираме и прошириме просторот на лабораторија за да се овозможи подобар комфор на вработените и пациентите, рече Оливера Цимбаљевиќ, директор на Општа болница Кочани.
Дел од средствата, додаде Цимбаљевиќ, меѓу другото се планирани и за замена на прозорците од северната страна на болницата на кои што промена не им е извршена од изградбата на самата болница. Дел од средствата ќе бидат искористени и за набавка на нова медицинска и информатичка опрема.