Лани околу 300 поплаки пристигнале до Организацијата на потрошувачи од Кочани, од кои најголем дел се однесуваат на неквалитетни производи, особено мобилни телефони кои што брзо се расипуваат и високи сметки за телефон посебно од операторот ВИП.
– Потрошувачите кога ќе купат паметен телефон по извесно време ќе дојдат и ќе се пожалат дека не е во ред телефонот, дека му е дојдена висока сметка за телефон, а тој не бил тука, односно бил во странство и не го ни пипнал телефонот. Всушност операторите ја надоградиле неговата сметка и секако дека потрошувачот е во право, бидејќи не бил во него телефонот цел месец, а му доаѓа сметка за телефон, изјави Виолета Зашева, претседател на Организација на потрошувачи Кочани.
Таа додаде дека во 2016 година бил намален бројот на поплаки кон ЕВН и КЈП Водовод, институции кон кои досега имаше најмногу поплаки во делот на фактурирана вода повеќе од потрошеното и да се плати долг кој што не постои.
Останатите жалби и поплаки од граѓаните, нагласи, се однесуваат на оштетени нови производи, производи со недостаток, во однос на исхраната производи со изминат рок на траење во продавниците и маркетите, непочитување на гаранциите на производите, неисправни производи од бела техника, апарати за домаќинството и неквалитетен мебел.
Организацијата на потрошувачи Кочани во текот на изминатата година спровела повеќе општо правни советувања, лични, телефонски и писмени, а одржани се и повеќе советувања за здравјето и за задолжително означување на храната на секој артикал за потеклото, состојките и адитивите во него.