Градоначалникот Коце Трајановски иако вети во изборната трка, сепак нема да го гасифицира Скопје.
На истекот на стотте дена од новиот мандат, Трајановски ќе предложи укинување на Јавното претпријатие што беше формирано за таа намена уште во 2007 година, а се очекува мнозинството на Советот да го изгласа ваквиот предлог следната недела, пишува Утрински весник.
Скопскиот градоначалник се одлучил на ваков чекор поради одземените ингеренции во оваа област и измените во Законот за енергетика.
– Не се обезбеди партнер и инвеститор од причини што во економските услови кои се присутни на енергетскиот пазар на Македонија сеуште нема посебен интерес кај инвеститорите за да се инвестира во дистрибуција на природен гас. Освен тоа, со новиот Закон за енергетика кој во меѓувреме беше донесен одземено е правото на Градот Скопје непосредно да ја додели работата на можен инвеститор во секторот на дистрибуција на природен гас, бидејќи ингеренциите за отпочнување постапка за давање на концесија во областа на гасификацијата се префрлени на ниво на држава, вели во образложенито Коце Трајановски.