Руската амбасада во Македонија отвори Книга на жалост во знак на почит кон загинатите во авионската несреќа што се случи вчера над Црното Море во близина на Сочи и сочувство со нивните семејства и најблиски.
Книгата на жалост ќе биде отворена во Амбасадата на 26 и 27 декември 2016 година од 10.00 до 13.00 и од 15.00 до 17.00 часот, информираат од Руската амбасада.
Поради авионската несреќа што однесе 92 човечки живота, во Руската Федерација е прогласен Ден на жалост.
Авион на руското Министерство за одбрана Ту-154 со 92 патника се урна вчера во Црното Море по полетување од Сочи кон Сирија при што загинаа сите патници и членови на екипажот. Во авионот имало 84 патници и осум членови на екипажот, а исчезнал од радарите во 5.40 минути по московско време (3.40 часот по средноевропско време).
Меѓу патниците биле и 64 членови на воениот ансамбл за народни песни и игри „Александров“, девет новинари и воени лица. Ансамблот „Александров“ требало да одржи новогодишен концерт за руските војници стационирани во базата „Хмејмим“.