Во Министерството за одбрана денеска заменик-министерот Беким Максути имаше средба со воена делегација од вооружените сили на НР Кина, која престојува во неколкудневна посета на Македонија.
Како што соопшти МО, заменик министерот Максути изразил задоволство од високото ниво на односите помеѓу Република Македонија и Народна Република Кина и посочил дека билатералната соработка се развива во духот на пријателството, меѓусебното разбирање и заемното почитување.
– Пример за одличните односи се досегашните донации од НР Кина за Република Македонија, упатувањето припадници на АРМ на школување и доедукација во образовните центри во НР Кина, и тоа на Одбранбени и стратегиски студии, курсеви за инструктори, како и курсеви за боречки вештини, рекол Максути, соопшти МО.
Вицеадмиралот Ли Ји, кој ја предводи кинеската делегација, се заблагодарил за средбата и истакнал дека двете земји имаат одлична одбранбена соработка, за која изразил подготвеност, да продолжи и да се интензивира и во иднина. Посочил дека размената на искуства помеѓу двете Армии и Министерства е во интерес и на Република Македонија и на НР Кина.