„Мали ќе ви бидат затворите да ве соберат, кога ќе се смени власта“,со овие зборови се обрати кон пратениците од ВМРО-ДПМНЕ, Биљана Казанџиска, од СДСМ.
Власта и опозицијата се спротивствија за предлогот на СДСМ за социјалните случаи да се издвојат по 2.000 денари за набавка на животни намирници од македонско производство. Ова за власта е само гол политички маркетинг.
„На народот му треба леб, а не балет“, обвинија од СДСМ, побараа наместо барокни гаражи, палми и врби, парите да им се дадат на оние на кои најмногу им требаат. Потсетија дека Македонија е прогласена за најмизерна земја, во друштво со Иран и со Венецуела
Сето ова, велат од СДСМ ќе го цени народот, им порачаа на ВМРО-ДПМНЕ: „ Нишанете и пукајте, ама мислете и на мечката“.
На претседателот на Собранието, и на власта им забележаа зошто дозволиле по втор пат да се „убие“, Стив Наумов, и наместо да ја бранат, како што рекоа, „македонштината“, седеле во разладените канцеларии , играле спортска прогноза, а парите на народот ги трошат за скапи семејни патувања на државен трошок.
Пратениците од ВМРО-ДПМНЕ одговорија дека во време на владеење на ВМРО-ДПМНЕ најмногу пари се одвојуваат за доброто на народот, а патриотизмот, рекоа, е нешто вродено, тоа е кај оние кои не менуваат имиња и знамиња и не предлагаат географски одредници.