Продолжува неизвесноста во Законодавниот дом. Мнозинството и опозицијата според дискусиите и ставовите остануваат вкопани во своите ровови и нема одговор дали е можен договор или во декември ќе се „трча“ повторно по гласовите на народот.
Единствено изненадување беше говорот на Ферид Мухиќ дека размислил и го сменил ставот, па сега откако гласаше против распишување на Референдумот и референдумското прашање и одби да води кампања, ќе ги поддржи уставните измени.
Дали може да се очекува уште некое изненадување ќе покажат наредните денови. Според Деловникот останаа уште девет дена за дебата. Меѓу 52-та пратеници кои се пријавени, поголемиот број се од СДСМ и коалицијата. Денеска за прв пат јасно својот став ќе го даде поранешната министерка за култура Елизабета Канческа Милевска, но тука се и во наредните денови Владанка Авировиќ, Панчо Минов и уште дваесетина опозиционери.
На листата дискутанти ги нема Антонијо Милошоски, Влатко Ѓорчев, Борис Змејковски, Јохан Тарчуловски, Никола Груевски, кој вчера судското рочиште го одложи за да присуствува на седницата, како и Васил Пишев.
Денешниот собраниски ден започнува без видлив напредок во приближувањето на ставовите на пратениците од мнозинството и опозицијата и можноста да се обезбедат 80 пратеници кои би ја поддржале измената на Уставот.