Јулијана Петровска е единствената Македонка со Даунов синдром што успеала да се вработи. Нејзиниот дух и ведрина ќе ве освои и ќе ве инспирира никогаш од ништо да не се откажувате.
На периферијата на Скопје во една печатница свој печат става и дваесет и осумгодишната Јулијана, девојка со Даунов синдром, но и со медал за пливање, неколку успешни концерти на пијано, куса манекенска кариера и со силна амбиција да стане шефица во фирмата во која работи, пренесува Дневник.
Оваа девојка едноставно не може да не се забележи, има неверојатно харизматична насмевка, но и енергија што ја вложува. Не се штеди каде и да се појави.
Сакам да ги урнам бариерите. Сакам да работам, да бидам своја. Да имам мој личен успех, а тоа е мојата работа, но и моето образование. Завршив средно училиште за графичар, работам во печатница, па веќе шест години секој ден доаѓам на работа. Kако и секоја девојка на 28 години, обожавам шопинг, на тоа ја трошам својата плата. Но, секако, знам дека треба и да штедам, па имам моја книшка. Моја желба е да станам главна во фирмата, засега сум само помошник-графичар. Јас тоа го можам, знам странски јазик – српски, го научив од серии на телевизија, ама и многу сум вредна, сакам да работам – вака себеси се гледа во иднина Јулијана Петровска.