Бојан Јовановски кој е првоосомничен и во случајот поврзан со Меѓународниот сојуз е спроведен во Обвинителството за организиран криминал кај обвинителката Вилма Русковска.
Тој ќе треба да даде исказ пред неа за наводите злоупотреби за кои го товарат.
Јовановски е осомничен за измама и перење пари.
Пред него во Обвинителството беше неговиот татко Миле Јовановски, а исказ пред обвинител даде и неговата асистенка и осомничена во случајот, Христина Блажевска.
Миле Јовановски пред да излезе од судот рече дека не чувствува вина и ги поздрави новинарите со „Среќна нова ’49“.
Пред нив, исказ дадоа Јасна Мандиќ која беше заменичка на Бојан Јовановски и пратеничката Фросина Ременски која е почесен претседател во сојузот.
Истрагата за овој случај не е завршена, а осомничените минатата недела правеа увид во доказите за да се подготват за давање исказ.
Обвинителството ги сомничи за делата „измама“ и „перење пари“. Адвокатот на Јасна Мандиќ по распитот кај Русковска рече дека таа била донесена во заблуда од Боки 13, а пак, пратеничката Ременски очекува Обвинителството да ја запре постапката против неа.
Русковска најави обвинение за овој случај на почеток од идната година.