Колоната возила, кои во знак на отпор и денеска крстосуваа низ Скопје застана пред Владата каде беше побарана оставка од премиерот Никола Груевски.
„Премиерот по седумгодишно владеење е целосно опиен од власта и има изгубено контакт со реалноста. Македонија се наоѓа во длабока политичка криза и единствен излез од таа криза е политички дијалог и договор за предвремени парламентарни избори. Колку побрзо премиерот тоа го разбере, толку подобро за граѓаните“, рече потпретседателот на СДСМ, Зоран Јовановски.
Потенцираше дека парите и корумпираноста се причината за настаните кои доведоа до излегувањето на опозициските пратеници од Собранието.
„Позадината на сè она што се случуваше пред и после „црниот понеделник“ се парите. СДСМ со својот план за штедење се бореше да запре неразумното задолжување и непродуктивното трошење на оваа власт. Власта одлучи за пари да прекрши и деловник и закон и устав, да ги истепа пратениците и да ги исфрли новинарите од собраниската сала“, рече Јовановски.
Карванот на отпорот, продолжува и утре. Ќе почне во 5 до 12 часот од три локации по што поворките ќе се соединат пред Владата.
Во исто време карвани ќе има и низ сите поголеми градови во државата.
„Власта изгуби контакт со реалноста. Јасно беше дека власта нема да ја гласа иницијативата на АМАН за поевтинување на електричната енергија и за измени во Законот за енегетика“, вели Јовановски.