Вчера „Сојузот за иднината“ – Битола ја промовира претходно најавената „Бела книга“, во која им ги презентираат на јавноста сите нерегуларности и прекршувања на изборните правила, како за време на изборната кампањата така и на изборниот ден. Тие најавија серијал од пресови за обелоденување на сите црни сценарија што се случиле на 24 март.
Од СДСМ – Битола велат дека сè повеќе граѓани им кажуваат за бројните неправилности, за силниот притисок што е вршен врз нив и нивните комшии и пријатели, и за поткупот. Најмногу зборуваат од руралните средини, велат, од каде што, како што тврдат, доаѓаат директори и локални „шерифи“, кои никогаш претходно не дошле во нивните средини и одат од куќа во куќа давајќи им на луѓето од 500 до 1500 денари.
„Премногу сиромашен народ сме, нè купуваат за многу малку пари, за 1500 денари и толку ,а директорите и локалните шерифи повеќе можеби никогаш нема да ги видиме“.
Во некои посиромашни села велат дека веќе немаат никакво достоинство:
„Денес има луѓе кои едвај преживуваат,па многу е лесно да ги поткупат, ама да се продадеш за масло и брашно навистина е газење по нивнат чест“.
Поради сите овие притисоци и нерегуларности, како што изјавија од СДСМ, од денес почнуваат кампања под мотото: „Јас сум битолчнец, јас не се продавам“, со цел, како што велат, да ги охрабрат битолчани да не подлегнуваат на притисоците и да им укажат дека на денот на изборите тие сами одлучуваат за својата иднина, а зад параванот никој не може да ги види за кого гласаат.
