Ова што се случува вечерва е удар врз демократијата. Ова е дно. ВМРО-ДПМНЕ е под полициска опсада. Членовите на партијата се претресуваат и вознемируваат од страна на полицијата, рече Игор Јанушев од ВМРО-ДПМНЕ.
– Никогаш немало примена на ваква сила врз опозициска партија. Ова е хајка и линч врз сите кои мислат поинаку. Во ваквиот прогон, Заев ги злоупотребува и медиумите. Ова не е помирување, туку зовривање на политичката криза. Овој притисок е удар врз опозицијата и тој нема да помине туку-така. ВМРО и Македонија се жртви на неспособноста на Заев. Година и половина ја уништуваат државата и сето тоа го прикриваат со политички прогон, рече Јанушев.
Тој рече дека ќе дојде денот кога тие што го извршувале прогонот ќе одговараат за тоа.
– Доколку полицијата поседува налог и се сомнева дека Никола Груевски е во штабот, може слободно да дојде и со нас да провери. Ова е политички прогон, ништо повеќе, ништо помалку, рече Јанушев.
Тој кажа дека Груевски повеќе од 6 месеци не бил во штабот на ВМРО-ДПМНЕ.
Јанушев во име на партијата се извини на новинарите што беа наречени „загари на Заев“.
Кристијан Ландов