Од почетокот на летната туристичка сезона при влез во земјата од Грција, во 25 случаи македонски државјани пријавиле украдени регистерски таблички од нивните автомобили. На 18 возила им биле украдени и двете таблички.
Во 16 случаи кражбите се пријавени и кај грчката полиција, информираше денеска министерката за внатрешни работи Гордана Јанкулоска.
Исто така пријавени се и четири случаи на оштетувања на возила односно на задната табличка на возилото со црн спреј била избришана ознаката „МК“ и во некои случиа било напишано „ГР“.
Најчесто, според Јанкулоска која одговараше на прашање на пратеникот Милорад Додевски од ВМРО-ДПМНЕ, кражбите се случиле во Ханиоти и во Неа Пори. Иако добар дел од кражбите се пријавени и во грчката полиција, досега МВР нема добиено никаква информација од грчките колеги за случаите.
– Немаме информација дека некои од овие случаи се разрешени, изјави Јанкулоска.
Петнаесет од македонските граѓани кои пријавиле кражба или оштетување се од Скопје, а останатите од повеќе други градови.
Инвестициите во инфраструктурниот развој во дебарско-мавровскиот регион оваа година изнесуваат околу пет милиони евра односно 330 милиони денари. Заменик-министерот за транспорт и врски Џељаљ Бајрами, одговарајќи на прашање на пратеничката Јулиета Марку од ДУИ, во однос на патниот правец Дебар-Маврово рече дека работите на делот од Извор до Бошков мост се почанти во рок. Во дел од патниот правец работите се завршени целосно, но се поставува сигнализацијата и ознаките на патот. Изградбата на патот чини 90 милиони денари,а патниот правец набрзо ќе биде пуштен во употреба.
Се реконструира и патниот правец Струга – Дебар, кој многу одамна не бил саниран. Според Бајрами, реконструкцијата на овој патен правец ќе чини 240 милиони денари.