Министерката за внатрешни работи Гордана Јанкуловска го посети изборниот штаб на кандидатот за градоначалник на општина Велес од редовите на ВМРО ДПМНЕ и коалицијата „За подобра Македонија“, Славчо Чадиев.
– Можам да кажам дека како кандидат, Чадиев е најдобриот избор за кој треба да гласаат велешани, затоа што тој секогаш нуди иницијативи, размислувања за решавање на конкретни проблеми, има предлог-проекти кои имаат временска динамика на завршување за реалните проблеми на граѓаните, потенцираше Јанкуловска.
Таа изврши споредба на кандидатите за градоначалници на општина Велес, при што истакна дека Чадиев е подобар избор за велешани од Аце Коцевски од Сојузот за иднината, бидејќи, тој, како што истакна, веќе имал можност да се покаже, но и заради тоа што припаѓа на една политичка групација која зборува за апстрактни теми кои не ги решаваат проблемите на граѓаните.
– Јас сум министер за внатрешни работи веќе подолго време и кога Аце Коцевски беше градоначалник на општина Велес и тогаш немаше буквално никаква иницијатива од страна на локалната самоуправа за решавање на најгорливите проблеми на велешани, нагласи, Јанкуловска.
Изрази уверување дека во недела велешани ќе ја поддржат политиката и делата на прогресот, на постојаната работа, на испорачувањето на резултати, наспроти понудата на Коцевски односно застерениот модел на водење на политика.
– Верувам дека граѓаните на Велес ќе го направат вистинскиот избор бидејќи, Славчо Чадиев ја има целосната поддршка и од ВМРО ДПМНЕ и од победничката коалиција „За подобра Македонија“, од сите претставници на институциите, но најважно од велешани кои во него препознаваат човек кој може да ги застапува нивните интереси, порача Јанкуловска.