Јаневска: Нашите ученици каснат многу во однос на нивните врсници во Европа

Од:

Воведувањето на едносменското работење на училиштата, таму каде што е можно е дел од реформата во образованието, а целта е учениците да бидат подолго во училиштата, за да стекнуваат на различни начини што повеќе знаење, истакна денеска Министерката за образование и наука, Весна Јаневска во Скопје, која одговараше на новинарско прашање за воведување на едносменската настава во основните и средните училишта во земјава.

Таа додаде дека оваа реформа е и за наставниците да станат функционални во корист на знаењЕто, компетенциите и вештините на учениците.

-Ова е цела една Стратегија. Општо е познато дека ние во земјава имаме вишок на наставници, а се помалку деца. Но, не велиме дека тие се вишок, оти нас ни требаат наставниците, за да го подигнат квалитетот на знаењето. Ние сме последни на сите меѓународни тестирања и домашните тестирања покажуваат дека нашите ученици каснат многу во однос на нивните врсници во Европа, каде што ние се стремиме, рече Јаневска.

Министерката за образование и наука, Јаневска појаснува дека учениците кои ќе следат едносменска настава нема цел ден да бидат над книгата, туку целта е интерактивно да го совладаат материјалот.

-Ако имаат домашна, истражување, проектна задача да го завршат тоа, да имаат многу спорт, да имаат многу информатика, да имаат претприемништво, да имаат физичко. Значи се она што им е потребно за реално да влезат во животот, за којшто се подготвуваат. Но и да научат критичко мислење, она што им недостасува на нашите деца, да научат решавање на проблеми, препознавање на проблеми од типот на булинг, препознавање и прифаќање на различностите, појасни Јаневска.

Министерката за образование и наука истакна дека досегашниот образовен систем не го овозможува сето ова. Јаневска вели престојот на децата во училиштата нема да им биде тежок, бидејќи освен настава ќе имаат разговори и слободно време.

-Значи не е ништо страшно. Таму каде што има услови започнуваме со оваа реформа. Таму каде што нема услови, каде што децата и наставниците се во две смени не ни очекуваме тоа да се спроведува, изјави Јаневска во Скопје по потпишувањето на партнерство меѓу групацијата НЕЛТ и УНИЦЕФ за унапредување на стручното образование преку практична настава за зелени вештини.

Би можело да ве интересира

Јаневска: Издадовме решение за привремен престанок на работа на Факултетот за бизнис економија во Скопје

Јаневска: Учебниците што им недостигаат училиштата ќе може да ги најдат во ПДФ-формати на веб-страницата на Педагошката служба

СДСМ: Признанието на Јаневска дека учебници ќе се обезбедувале преку донации е скандалозно, да си поднесе оставка

Катерина Ѓуровски

Јаневска: Има неколку сериозни наследени проблеми во врска со Студентскиот дом во Тетово

Од 2026 година нова методологија за финансирање на основното и средното образование

Едносменска настава има во 150 училишта, во 25 треба доградба на училници