Министерката за образование и наука Весна Јаневска не очекува дека ќе има недостиг од наставници од прво до петто одделение по усвојувањето на Законот за основно образование.
Со новините е предвидено наставници кои завршиле за педагог да може да предаваат само од прво до трето, а оние со завршен факултет за одделенска настава ќе имаат можност да работат од прво до петто одделение. Поради тоа, дел од наставниците веќе прават петиција да остане претходното законско решение плашејќи се да не останат без часови.
– МОН направи анализи и не очекуваме наставниците да останат без часови бидејќи тие имаат можност да работат и во дневен престој. Но, повторно правиме анализи и доколку се појави недостиг на наставници во одделенска настава, од прво до петто одделение, пратениците ќе може да поднесат амандман и ќе направиме мала измена во Законот за основно образование, рече Јаневска одговарајќи на новинарско прашање при посетата на Универзитетот „Мајка Тереза“.