Доцни исплатата на ученичките и студентските стипендии. Наместо државата да ги мотивира, но и да им помогне на младите во овие кризни времиња, кога голем дел од семејствата одвај врзуваат крај со крај, тие се оставени да преживуваат како знаат и умеат рече на прес конференција Весна Јаневска претседателката на Комисија за образование и наука на ВМРО-ДПМНЕ.
Учениците кои се стекнале со право на стипендија во оваа учебна година, не добиле ниту денар. Од друга страна, резултатите од конкурсот за студентски стипендии за студиската 2022-2023 година уште не се објавени, а кој знае кога ќе им се исплатат парите на оние кои што ќе се најдат на списоците. Нема пари ниту за субвенциониран студентски оброк, иако беше ветено дека ќе се исплаќа месец за месец. Министерството за образование и наука не може да го исплати износот од 120 денари, а не пак, како што најави да го зголеми тој износ вели Јаневска.
Таа тврди дека учениците запишани во Математичката гимназија цела недела губат часови по математички и информатички предмети затоа што како што рече немало средства да им се исплатат платите на професорите. Спред Јаневска тренерите во Спортските академии исто така не држат настава бидејќи не им биле продолжени договорите, а и не им се исплатени плати за неколку месеци.