Со изградба на фекалната канализација за прифаќање и третман на отпадните води во општина Илинден трајно ќе се реши проблемот за над 1.000 жители, истакна министерот за транспорт и врски Миле Јанакиески.
При денешната посета на општина Илинден и населеното место Кадино каде што се гради фекална канализација, Јанакиески потсети дека секое семејство месечно издвојувало од 1.000 до 2.000 денари за празнење на септичките јами.
– Претходно жителите имаа септички јами и секое семејство мораше месечно да издвојува меѓу 1.000 и 2.000 денари за празнење на тие септички јами. Значи покрај тоа што ќе се реши проблемот со канализацијата семејствата ќе имат заштеда од околу 2.000 денари, рече Јанакиески.
Проектот „Водоснабдување и одведување на отпадни води“, додаде тој, тече според предвидената динамика, а се реализира со средствата кои ги доби Владата од Европската инвестициска банка. Во негови рамки завршени завршени се шест проекти, а на 24 локации во 24 општини низ државата се одвиваат градежни работи.
Градоначалникот на општина Илинден Жика Стојановски информира дека изградбата на канализациската мрежа во населеното место Кадино е во должина од 4.000 метри и пречистителната станица е со капацитет за 1.250 еквивалент жители.
– Целта е да го реализираме проектот заради подобрување на условите за живеење на граѓаните, изјави Стојановски.
Проектот за изградба на фекална канализација за прифаќање и третман на отпадните води содржи канализациски систем со пречистителни станици кои се комплетно автоматизирани и претставуваат модуларни системи кои што зафаќаат мал простор, имаат мала потрошувачка на електрична енергија и можат да се надградуваат во согласност со зголемувањето на капацитетот на еквивалент жители. Градежните активности треба да завршат до крајот на годината.