Министерот за транспорт и врски Миле Јанакиески при посетата на Пишичка брана во општина Пробиштип повика општините кои се зафатени со поплави да формираат тимови и да ги достават првичните анализи од штетите на семејните домови, инфраструктурата, водоснабдителните системи и на земјоделските посеви.
– Координативното тело секое утро одржува состаноци и носиме предлог-мерки. Дирекцијата за заштита и спасување интервенираше во повеќе општини во Република Македонија, во координација со општините. Јас сум во постојан контакт со градоначалниците на загрозените региони и со Дирекцијата имаме веќе преземено конкретни мерки, ангажиравме градежна механизација, пумпи, вреќи за правење на насипи, рече Јанкиевски.
При посета на Пишичка брана Јанакиески рече дека водата од браната во наредните седум дена ќе се испушти, а потоа ќе се санира или ќе има целосна изградба. Во браната има околу 800.000 метри кубни вода.
Министерот за труд и социјална политика Спиро Ристовски, пак, попладнево ги посети Штип и Свети Николе и најави евакуирање на жители загрозени од поплавите.
– Алармантна е ситуацијата во Светиниколско а и во Штип. Седумнаесет ромски семејства кои беа сместени во зградата „Стара Кланица“ во близина на Брегалница ќе бидат сместени во просториите на поранешното Одделение за неврологија. Црвениот крст веќе им донираше ќебиња и храна, рече Спировски.