Градоначалникот Стевчо Јакимовски реагираше по повод, како што вели, неоснованите обвинувања од СДСМ за т.н. „партиска чистка“ во Општина Карпош.
„СДСМ продолжува со неинвентивната практика на неосновани обвинувања и изигрување плачковци. Последниот ваков атак во низата им е дека на 11 привремено вработени во Општина Карпош им е прекинат договорот за работа. Притоа, од СДСМ забораваат да ја проверат веродостојноста на фактите и се потпираат на „рекла – кажала“. Станува збор за истекување на договорот на девет привремено вработени во Општината, од кои петмина се членови на ГРОМ.
– Но, СДСМ заборава и нешто друго. Заборава дека ги изгуби изборите во Општина Карпош, односно дека Стевчо Јакимовски ја доби довербата од најголемиот број граѓани. Заборава и дека прво ним им беше понудена соработка за функционирање на Советот на Општината, но тие ја одбија коалицијата. И, конечно, го забораваат најважното, дека СДСМ не е на власт во Карпош и дека сега е предоцна за каење, па им останува само плачење по прес-конференции“, вели градоначалникот на Општина Карпош, Стевчо Јакимовски.