Ние сме шокирани од нападот на Собранието вчера во Скопје. Ги осудуваме овие насилни и неприфатливи напади против пратениците. Насилството нема место во демократијата, изјави ко-известувачите на Парламентарното собрание на Советот на Европа (ПССЕ) за пост-мониторинг дијалогот со Република Македонија, Лиза Кристофсен (Норвешка, Социјалистичка група) и Валериу Гилецки (Република Молдавија, Европски народни партии), пренесува дописникот на МИА од Стразбур.
Апелираат до сите политички партии и засегнати страни да се воздржат од разгорување на тензиите и да покажат одговорност со поттикнување на дијалогот и отворајќи го патот за мирно политичко решение.
– Во демократските земји, претседателот на Собранието и Владата мора да бидат назначени преку политички дијалог, во согласност со изборот изразен од страна на гласачите и демократските принципи, се вели во нивното заедничко соопштение.
Парламентарното собрание внимателно ќе го следи тековниот развој на ситуацијата во земјата. – Време е да се стави крај на политичкиот ќор-сокак, четири месеци по парламентарните избори, додаваат Кристофсен и Гилецки.
Граѓаните, како што посочуваат, заслужуваат нивните интереси и очекувања да се разгледуваат со достоинство и смиреност, односно да се лансираат неопходните и итни реформи за обезбедување демократија, владеење на правото и човековите права, за доброто на сите граѓани.
– Ние очекуваме македонските власти да ги преземат сите неопходни чекори за надминување на оваа криза и повторно да се воспостават функционален демократски институции, истакнуваат Кристофсен и Гилецки.