СВР Скопје изминатата недела спроведе зајакнати контроли на подрачјето на Град Скопје и од страна на сообраќајната полиција санкционирани се вкупно 1.018 учесници во сообраќајот за сторени прекршоци од Законот за безбедност на сообраќајот, соопшти Министерството за внатрешни работи.
Кај 45 возачи е утврдено дека управувале возила под дејство на алкохол, потоа 74 лица управувале возила со измината важност на сообраќајната дозвола, без возачка дозвола управувале 44 возачи, кај 22 лица е утврден сообраќаен прекршок за поминување на црвено светло, 37 возачи управувале возила со над дозволената брзина, а 28 возачи управувале возило со над 90 км на час во населено место.
Изречени се 69 прекршоци за некористење на сигурносен појас, 42 прекршоци за зборување на мобилен телефон, потоа 32 прекршоци за паркирање во зона на крстосница, автобуска постојка и пешачки премин, 343 прекршоци за неправилно и непрописно паркирање, за недавање на првенство на минување изречен е еден прекршок, за недавање првенство на минување на пешаци изречени се пет прекршоци, за непрописно престројување изречени се 15 прекршоци, за прекршоци што ги чинат пешаците изречени се 70 прекршоци. За сообраќаен прекршок претовар изречени се три прекршоци, кај 10 возила е утврдена техничка неисправност и со пајак возило подигнати се вкупно 357 возила.
СВР-Скопје и натаму ќе продолжи со зајакнати сообраќајни контроли по однос на прекршоци кои доведуваат до сообраќајни незгоди и апелира до граѓаните да ги почитуваат сообраќајните правила и прописи со цел да се намалат сообраќајните незгоди.