Измамите што се случуваа пред извесно време во земјава, преку телефонски јавувања, повторно се враќаат.
Па така, вчера 77-годишна жена од Скопје пријавила дека во 09.00 часот телефонски ѝ се јавиле две непознати лица кои ја известиле дека нејзините ќерка и зет во населбата Аеродром со возило прегазиле дете.
Едното лице, според МВР, се понудило да помогне како сведок на настанот, за што ѝ биле побарани пари.
По одредено време, на улица во населбата Гоце Делчев во Скопје пристигнало патничко возило, со скопски регистарски ознаки, во кое имало две лица. Жената им дала 52.000 денари.
Подоцна, пријавителката исконтактирала со нејзиниот син, по што сфатила дека е измамена.
Од МВР велат дека се преземаат мерки за расчистување на случајот.