Власта и опозицијата денеска се судрија за измените и дополнувањата на Законот за вработување и осигурување во случај на невработеност.
Цветанка Иванова од СДСМ рече дека ова е уште еден закон со кој се кратат правата на граѓаните во Македонија.
„Овој закон е спротивен на Уставот, со кој е загарантирано правото на работа и на достапност на секое работно место. За да останете во списокот на Агенцијата на невработени треба да прескокнете многу пречки“, рече Иванова.
Побара Владата да го повлече законот. Ова за власта е неприфатливо, бидејќи како што рече министерот за труд и социјална политика, Спиро Ристоски никој нема да биде избришан од евиденцијата.
Појасни дека ќе се воведат два типа на евиденција – евиденција на лица кои активно бараат работа и евиденција на лица кои не бараат активно работа, а остануваат евидентирани во списокот на Агенцијата за вработување заради остварување на други социјални права.