Претседателот Ѓорге Иванов денеска ги прими акредитивните писма на новоименуваниот амбасадор на Исламска Република Иран, Саид Садег Мохаммади.
Иванов, како што информира неговиот Кабинет, му посакал успешно извршување на функцијата и изразил надеж дека како прв резидентен амбасадор на Исламска Република Иран во Република Македонија ќе придонесе во развој на соработката меѓу двете земји во областите од заемен интерес.
– Приоритет во односите меѓу двете земји во претстојниот период треба да биде унапредување на економската соработка и јакнење на трговската размена, истакнал Иванов, потенцирајќи ја потребата од унапредување на договорната рамка меѓу двете држави.
Амбасадорот Мохаммади посочил дека неговото именување за прв резидентен амбасадор во Република Македонија е доказ за решителноста на Иран за градење и развивање на соработката со Македонија.
– Поради старата цивилизација, богатата култура, посветеноста во градењето мирен соживот помеѓу различни етнички и религиозни групи, Македонија ужива посебен статус во Исламската Република Иран, дотолку што е порта кон Балканот и Европа и уверен сум дека со Ваша поддршка и наша решителност ќе бидат преземени суштински чекори во насока на развивање на билатералните односи, истакнал Мохаммади.