Граѓаните да не ја користат Итната Помош Куманово за посета на пациенти кои не се во животозагрозувачка состојба, бидејќи службата сега е ангажирана и за превоз на заразени од Ковид 19 до Инфективната клиника во Скопје и до инфективното одделение во Куманово, апелираат од Итна Помош Куманово.
Во денешното соопштение оттаму препорачуваат граѓаните, хронично болните пациенти редовно да ја користат препишаната терапија од матичните лекари и специјалисите и нагласуваат дека во овој период примаат повици само за животно-загрозувачка состојба. Од Итна Помош Куманово апелираат граѓаните да не ја злоупотребуваат службата за посети на хронично-болните лица кои си користат терапија, за пациенти кои се во изолација, а не им е загрозен животот и додаваат дека транспортот до инфективното одделение се врши само по препорака од доктор епидемиолог.
– Итна медицинска помош моментално располага со осум лекари, по двајца во смена и три санитетски возила од кои една екипа и едно возило се користи за транспорт на пациенти позитивни на Ковид 19 до инфективно одделение во Куманово или до Инфективна клиника во Скопје поради што, некогаш Итна медицинска помош останува со една екипа и мора да врши селекција на повици, се вели во соопштението на Итна Медицинска помош.
Оттаму замолуваат за разбирање, ги повикаа граѓаните да останат дома и да го чуваат сопственото и здравјето на другите. Итна помош Куманово ги покрива и подрачјето на соседните општини и територија со околу 130.000 илјади жители.