Вчера по телефонски повик од јавен обвинител, во Обвинителството за гонење организиран криминал и коруцпија, изјава дал градоначалникот на општина Карпош, Стефан Богоев, во истрагата за рекет, соопштија од Обвинителството.
Денеска изјава дала и градоначалничката на општина Битола, Наташа Петровска. Детали од Обвинителството не соопштуваат.
„Паралелно со прибирањето на вербални докази, Основното јавно обвинителство за гонење на организиран криминал и корупција во континуитет дава насоки и наредби за вршење и на други истражни дејствија“, соопштија од Обвинителството.
Вештачењата на прибраниот обемен материјал од извршените претреси е во тек. По наредба на Oбвинителството се вештачи и содржината на пронајдениот и одземен втор мобилен телефон на јавниот обвинител.
Досега двајца бизнисмени дале исказ пред обвинителката Вилма Русковска. Првоосомничен е неформалниот сопственик на „1 ТВ“, Бојан Јовановски за тргување со влијание со специјалната јавна обвинителка Катица Јанева, а второосомничен е бизнисменот Зоран Милевски со прекар Кичеец.