Исплатата на приватните специјализанти доцни поради административни процедури, изјави министерот за здравство, Венко Филипче. Тој рече дека сите приватни специјализанти ќе бидат исплатени ретроградно, но не можеше да презицира дали средствата ќе им бидат префрлени овој или следниот месец.
„Сите тие млади колеги ќе ги добијат парите ретроградно. Дали исплатата ќе биде од месец август или од септември не можам да кажам зошто може да се одолговлечи некоја административна процедура“, рече Филипче.
Тој рече дека има две групи приватни специјализанти – за исплата на едните биле одвоени средства од буџетот, додека за втората група што се запишала во март годинава не биле предвидени средства.
„Станува збор за две групи. Едната е од над 300 специјализанти за кои беше правена пресметка за нивна исплата во тек на минатата година и тие средства беа предвидени во буџетот за оваа година. Огромен дел од тие специјализанти веќе го добија надоместокот и има само мал дел за кои се средуваат административни процедури, меѓутоа таа група за кратко време ќе ги добие парите. Втората група специјализанти беа оние што се запишаа во март оваа година и за нив средства во буџетот воопшто не беа предвидени, но со оглед на тоа што ветивме дека и тие ќе добијат соодветен надоместок, се одвои сума на пари од буџетот во ФЗОМ и сега во тек се административни процедури. Тоа е причина зошто се доцни со ветените исплати за приватните специјализанти“, рече Филипче.