Во врска со случајот со родилката која скокна од прозор на УК за гинекологија, денеска Државниот санитарен и здравствен инспекторат врши вонреден инспекциски надзор.
Комисијата е излезена на терен и во тек е надзорот за утврдување на фактичката состојба, а по изготвување на извештајот од страна на ДСЗИ, јавноста ќе биде информирана.
Триесет и деветгодишната жена која синоќа се обиде да си го одзеде животот фрлајќи се од првиот кат на Клиниката за гинекологија два дена откако родила здраво машко дете, е во многу критична состојба на интензивна нега. Ова го потврди директорката на ГАК, д-р Викторија Јовановска.
– За жал пациентката е во многу критична состјба, сега зборував со директорката на КАРИЛ која е во моментов дежурна. Пациентката не сакала да го дои бебето, била лесно вознемирена, но тоа не е првпат да се случува– рече д-р Јовановска.
Во болницата била донесена во 36-та недела од бременоста. Било констатирано дека се работи за предвремено одлепување на постелката што ги загрозувало и мајката и детето и затоа била однесена во породилна сала и за 14 минути била породена со царски рез. Бебето е во добра состојба.
Во петокот, пациентката се пожалила на вознемиреност и извршен е разговор со клинички психолог. Вчера, пак, на утринска визита пациентката се пожалила на слична симптоматологија како и во петокот, при што дежурните лекари извршиле разговор со неа, ординирана е соодветна терапија и донесена е одлука, за подобра проценка на состојбата пред испис да се повика психијатар. Ноќта околу 21.30 часот пациентката преку прозорецот во ходникот направила обид за суицид, фрлајќи се од првиот кат.
Пациентката итно е пренесена на КАРИЛ во придружба на дежурната екипа, а немилиот настан е веднаш пријавен во надлежните институции кои излегоа веднаш на терен за разјаснување на случајот – образложи организацискиот директор на ГАК, Јетон Шаќири.