Во Кочани во тек е постапка за враќање на поранешното име на улицата “Маршал Тито“, за што иницијатива до Советот на општината поднесе Здружението на граѓани „Јосип Броз Тито“.
Од локалната самоуправа на Кочани потврдија дека слично писмено барање испратила и советничката група на СДСМ, а со оглед на законската обврска, била побарана согласност од Владата од каде е добиен позитивен одговор.
– Мислам дека членовите на Советот воопшто не треба да се колебаат во врска со нашата иницијатива и да ја разгледаат на првата наредна седница. Очекуваме дека ќе донесат правилна одлука и ќе го вратат името на улицата што пет децении го носеше името на нашиот патрон и претседател на поранешната заедничка татковина, во која македонскиот народ конечно ја оствари вековната желба да добие своја држава, истакна Трајан Трендов, претседател на Здружението „Јосип Броз Тито“.
Комисијата за култура, образование и спорт на општина Кочани неодамна ја разгледуваше предлог – листата за именување на десет улици, при што беше прифатен предлогот две од нив да ги добијат имињата на поранешните претседатели на РМ Киро Глигоров и на бивша СФРЈ Јосип Броз Тито.
Името на улицата „Маршал Тито“ во Кочани беше променето во „ВМРО“ пред четири години, за што одлука донесе тогашното мнозинство на Советот на општината.