Националната агенција за европски образовни програми и мобилност во Македонија денеска организираше Инфо ден во рамки на циклусот промотивни активности за програмата „Еразмус плус“.
Презентери на настанот беа Марија Стефковска и Лулеса Илјаз,, претставници на Агенцијата кои ја претставија програмата на Европската комисија во делот на образованието, обуката и младите, „Еразмус плус 2014-2020“, како и иницијативите на ЕУ, „Еуропас“ и „Евридика“.
Како програма, „Еразмус плус“ на заинтересираните им нуди да партиципираат во друга програмска држава за учење, работа, предавања воедно да обучуваат или развиваат професионални вештини и компетенции, но и да развиваат билатерални и мултилатерални партнерства, зависно од секторот. Програмата претставува комбинација од седум европски образовни програми, програми за обука и млади, и првпат во својата структура го додава спортот.
Вкупниот буџет за ЕРАЗМУС+ изнесува 14,7 милијарди евра, зголемувајќи го претходно постоечкиот буџет за сите програми за 40 проценти. Нуди зголемени можности за учење во странство за ученици и наставен кадар. Грантираните проекти ќе обезбедат обука за приближно четири милиони лица и 125.000 организации.
На Инфо денот во Крушево, како што информираат од Агенцијата, се покажа интерес за клучнa акција 1 – „Учењето преку индивидуални мобилности“ која создава можности за индивидуите да ги подобрат своите вештини, подобрување на вештините за вработување и зголемување на културната свест.
Агенцијата планира да спроведе инфо денови во повеќе градови низ Македонија, поточно во Охрид и Ресен. Дополнително, а со цел зголемување на вклученоста на бизнис заедницата предвидени се и информативни работилници во соработка со стопанските комори во Република Македонија.
Покрај наведените настани Националната агенција планира и реализација на ЕКВЕТ конференции во насока на подигнување на свесноста во овој образовен сегмент.