На средношколците од скопските гимназии Раде Јовчевски Корчагин и Ѓорги Димитров им беше забрането излегување за да не одат на студентскиот протест. Вратите, како што не известија револтирани родители, биле заклучени. Но, дел од учениците, кои биле цврсто решени да одат на протестот и покрај заканите и уцените, излегле од гимназиите уште пред да се стави катанецот.
Родители отишле да се побунат во „Ѓорги Димитров“ зошто се заклучени учениците и да не одат да дадат поддршка на студентите против државниот испит, кој ќе се однесува токму на овие генерации средношколци.
Како што вчера пишуваа учениците, професорите и директорите од многу средни училишта им се заканувале, доколку одат на протест, нема да положат матура или дека ќе им биде намалено поведението и оценките.