Во општината Крива Паланка денеска се спроведе акцијата „Македонија без отпад 2012“, организирана од Министерството за животна средина и просторно планирање, Асоцијацијата за чиста животна средина „Ајде Македонија“ и општината Крива Паланка.
Учествуваа локалната самоуправа, воспитно-образовните општински институции ООУ „Јоаким Крчовски“ и „Илинден“, СОУ „Ѓорче Петров“, ЈКП „Комуналец“, подрачните одделенија за заштита и спасување и управување со кризи и заинтересирани граѓани.
Акцијата се одвиваше на повеќе пунктови во општината, кои ги селектираше стручна екипа од надлежните општински органи. Имаше расчистување во село Мождивњак, населбите Цонев Рид и Единство, мотел „Македонија“ и по должина на пешачката патека низ Бабин Дол до манастирскиот комплекс „Свети Јоаким Осоговски“.
Се уредуваа и училишните дворови, а на повеќе пунктови се собра големо количество стара хартија која ја презеде „Медиа Принт Македонија-МПМ. Останатиот смет ЈКП „Комуналец“ го пренесе во депонијата во село Конопница.
Организаторите апелираа и во иднина почесто да се спроведуваат вакви акции за да се чува животната средина во општина Крива Паланка.