Во просториите на Градската библиотека „Браќа Миладиновци“ Скопје, денеска ќе биде презентирана хуманитарната акција за Универзитетската клиника за детски болести – Скопје, во организација на Градската библиотека.
Настанот е организиран како „Отворен ден“ во Библиотеката и е именуван „Јавни личности во улога на библиотекари“.
Голем број личности од јавниот живот, актери, пеачи, спортисти, политичари, ќе ја преземат улогата на библиотекари и ќе услужуваат читатели, а собраните средства од членството ќе бидат донирани за опремување на „Игротека-библиотека“ на Универзитетската клиника за детски болести.
Настанот е подржан од првата дама на Република Македонија, Маја Иванова и Градоначалникот на град Скопје Коце Трајановски.
Настанот ќе биде збогатен со креативна работилница „Мали креативци“, со деца од предучилишна возраст, кои ќе цртаа на тема „Лекарите – бели ангели, пријатели на децата“.
Цртежите од работилницата ќе креираат сликовница која ќе биде печатена и дистрибуирана во „Игротеката – библиотека“ на Универзитетската клиника за детски болести.