Известувачот за Македонија во Европскиот парламент Ричард Ховит, како што најави за време на неговата последна посета на Скопје, побара одложување на гласањето по неговата резолуција за напредокот на земјата поради внатрешната политичка криза. Овој потег известувачот го прави поради можноста од негативно изјаснување на европарламентарците, пренесува Макфакс.
Во расправата по предлог-резолуцијата пред Комитетот за надворешна политика во Европскиот парламент во понеделникот, Ховит изрази жалење за моменталната политичка ситуација во земјата и побара од политичките чинители да го стават националниот интерес над партискиот.
„Верувам дека одложувањето ќе биде порака дека ја поддржуваме европската перспектива на земјата, но и дека бараме надминување на моменталната политичка ситуација”, рече Ховит.
Во меѓувреме продолжува амандманската расправа по предлог-резолуцијата на Ховит, каде според бројот на поднесени амандмани на врвот се бугарските и грчките европратеници.
