Македонија е важен партнер на НАТО и ја поддржуваме на патеката кон членство во НАТО, изјави генералниот секретар на НАТО, Јенс Столтенберг, на прес-конференцијата по средбата со премиерот Никола Груевски.
– Ви благодарам за вашата работа во Авганистан. Интеграцијата во НАТО бара тешки реформи и храбро лидерство. Имам пофалби за вашата земја, за реформите во кои можеме да видиме и предизвици. Со загриженост ги следиме случувањата и инсистираме на слобода на говор и на функционирање на демократските институции. Ги повикуваме сите политички сили да се ангажираат во политичките и во економските реформи во земјата. Ова е во интерес на сите граѓани – изјави Столтенберг.
Груевски истакна дека членството на Македонија во НАТО е во интерес на земјата.
– Ја поддржуваме политиката на отворени врати на НАТО. Разменивме мислења за напредокот на Македонија во Алијансата. Заеднички ги разгледавме и темите за реформите во врска со членството во НАТО. Зборував за реформите во одбраната, правосудството, економијата и на сите други полиња. Секако дека зборувавме и за актуелните прашања и дадов уверување дека сè ќе се одвива транспарентно и во согласност со законските прописи – истакна Греувски.
На прашањето дали е откриена странската служба и дали Груевски тоа му го предочил на првиот човек на НАТО, премиерот одговори дека подробно ја опишал состојбата, за сè она што му беше презентирано од шефот на опозицијата и сите материјали кои му биле презентирани од полицијата.
Извор: Мета