Премиерот Никола Груевски вечерва во обраќањето кажа дека ВМРО-ДПМНЕ победила во најмалку 25 општини во прв круг, и дека води во 32 општини. Според него, СДСМ води во шест општини, и во сите нив ќе се оди во втор круг, при што ВМРО-ДПМНЕ нема да се откаже од победа.
Ова што денеска се случи после 4 и пол години на тешка европска должничка криза покажува дека и покрај сите потешкотии граѓаните познаа дека ВМРО е политчка партија која многу работи и има чесен однос кон граѓаните. Сакам да подвлечам дека ова денеска што се случи е голема одговорност за нас, и укажува дека граѓаните препознаваат дека оваа политичка гарнитура е далеку поквалитетна од таа на СДСМ. Ветените проекти таму каде што победивме мора да ги завршиме, зашто за 4 години мора повторно да излеземе на избори и сакаме да ги погледнеме со чист образ со крената глава и во очи со завршени дела, рече Груевски.
Овие избори се и порака за таму каде што го добивме мнозинството дека се препознава дека успеавме да создадеме повеќе од СДСМ, дека сме изградиле повеќе дела, дека треба да продолжиме посилно од ова, но и порака за таму каде имаме послаб резултат дека нешто сме погрешиле и да си ги препознаеме сопствените грешки, да извлечеме порака од тоа, изјави Груевски.
На овие денешни избори покажавме дека во политиката кога станува збор за висок национален интерес може да се здружиме и со ривалите, тоа е позитивниот преседан кој може да го извлечеме и да биде поука за слични ситуации. Независно каков ќе биде исходот, без разлика на сето тоа, и Кичево и Струга се и ќе остаат Република Македонија и нераскинлив дел ќе останат без разлика на различни етно националистички соништа и илузии. Со голема енергија и посветеност, ќе се насочиме кон обезбедување на сигурна перспектива на нашите граѓани во тие општини, посочи Груевски.
