Според изјавата на премиерот на Република Македонија, Никола Груевски, која ја даде непосредно по свеченото отворање на ТИР- зоната во Штип, постојат реални шанси во текот на денешниов ден да биде постигнат договор меѓу членовите на ад хок комисијата за расветлување на настаните од 24 декември минатата година.
„Во текот на вчерашниот и денешниот ден има интензивни преговори. Денеска е денот кога се надеваме дека ќе дојде до договор. Јас сум на линија со нашиот преговарачки тим и се слушам на половина час. Не би сакал ништо да прејудицирам или пак да дадам некоја поспецифична изјава ,бидејќи може да се случи да наштети на преговорите зошто денес е клучниот и завршен ден“, изјави премиерот Груевски.
Груевски уште додаде дека без оглед на крајниот исход, за владејачката структура сите опции остануваат отворени.
М.Р.