Премиерот Никола Груевски денеска телефонски разговарал со Бакир Изетбеговиќ, претседавач на Претседателството на БиХ, во врска со катастрофалните поплави кои ја зафатија Босна и Херцеговина.
Двајцата размениле мислења за потребите и можностите за поддршка и помош. Премиерот Груевски при тоа изразил сочувство за жртвите од поплавите и ја истакнал подготвеноста Македонија да продолжи со помошта.
– БиХ може да смета на Македонија во рамките на нашите можности, истакнал Груевски, информираат од владината прес служба.
Покрај стокова поддршка како вода, храна, лекови и облека, тој истакнал дека Република Македонија ќе даде и финансиска поддршка за помош на настраданите.
Бакир Изетбеговиќ, од своја страна изразил благодарност за помошта која Република Македонија ја дава.
Премиерот Груевски телефонски разговарал и со Небојша Радмановиќ, српскиот член на Претседателството на БиХ.
Министерот за транспорт и врски Миле Јанакиески на дневна основа ќе комуницира со Центарот за справување со непогоди на БиХ во врска со координацијата на соработката.