Со вчерашното одложување на изборите закажани на 24 април, и утврдувањето нов датум за изборно соочување на 5 јуни, за ГРОМ, како што потенцираат од партијата, и официјално се потврдиле црните прогнози за Пржинскиот договор, кој се претворил во голема „пржинска измама’’ на граѓаните на Република Македонија со учество на претставниците на меѓународната заедница во земјава. Од ГРОМ сметаат дека вчерашните случувања ќе се повторат и на 7 април кога ќе треба да се распишат изборите.
– Од 2 јуни минатата година, до 24 април, или период од 10,5 месеци, Државната изборна комисија не мрдна, ниту со мал прст во насока на прочистување на избирачкиот список. Затоа, во исто време, членовите на ДИК си слават Св. Валентајн, си одат на викенди и не работат попладне, безмилосно ги трошат народните пари, земаат плата од народот и лажат дека списокот не е прочистен, изјави претседателот на ГРОМ Стевчо Јакимовски.
ГРОМ како политичка партија, истакна тој, е убедена дека на 7 април повторно ќе ја имаме вчерашната ситуација, кога СДСМ ќе одбива да учествува на избори, со изговори дека немало доволно време да се прочисти избирачкиот список, и дека медиумите не се регулирани.
– Повторно ќе се жалат и ќе плачат по амбасади и амбасадори. Амбасадорите и понатаму ќе вршат притисок за одложување на изборите закажани на 5 јуни, и се во недоглед, додека не успеат во намерата да инсталираат марионетска влада на СДСМ, која по затворањето на границите во Европа, ќе има задача да прими 500.000 бегалци и државата да ја претвори во огромен бегалски камп, вели Јакимовски.