Во рамки на работната посета на САД, заменичката на претседателот на Владата задолжена за политики за добро владеење, Славица Грковска, учествуваше на јавна дискусија на универзитетот „Џон Хопкинс“ во Вашингтон со Едвард Џозеф, експерт за Балканот и виш соработник на Институтот за надворешна политика на овој Универзитет.
Во дискусијата на тема „Зошто е толку тешка борбата со корупцијата во мојата земја“, вицепремиерката Грковска се осврна на бројните предизвици со кои се соочува Северна Македонија на ова поле, како и на напорите и политиките кои се преземаат за јакнење на антикорупциските механизми.
Коментирајќи ја нејзината иницијатива за измени на Законот за рестриктивни мерки во насока на проширување на основите за изрекување на мерки, вицепремиерката истакна: „И покрај гласноста на одредени поединци, уверена сум дека не може да биде неуставно доколку некој сака да дефинира постапка, уредена во закон, за да може надлежните институции да постапуваат и да отворат предмети за лица кои се на црна листа во САД“. Таа додаде дека како држава, не може да го игнорираме фактот и да не преземаме ништо кога САД, како наш најголем сојузник и партнер, санкционира лица заради вмешаност во корупција и организиран криминал во нашата земја.
Грковска истакна дека е илустративен примерот со поранешниот премиер Груевски, кој сѐ уште е бегалец од правдата, и кој исто така ги нападна обидите за зајакнување на правните антикорупциски механизми наведувајќи дека го загрозуваат суверенитетот на државата. „Токму тие кои го разбираат суверенитетот како поле за суверено ограбување на сопствениот народ се најголемиот проблем“, истакна Грковска.
Во однос на ниската доверба во правосудниот систем, како најслаба алка во справувањето со корупцијата, вицепремиерката истакна: „Ни требаат храбри луѓе и затоа, доколку некој не се чувствува доволно храбар и подготвен да се соочи со тој предизвик, да застане лице во лице со корупцијата, воопшто не треба да се пријавува во Академијата за судии и јавни обвинители“ и додаде дека се потребни луѓе кои дејствуваат со интегритет, професионалност и одговорност на сите нивоа во општеството.
Експертот за надворешна политика, Едвард Џозеф, кој како познавач на состојбите на Балканот ја иницираше денешната дискусија, ја оцени како „ендемска“ корупцијата во Северна Македонија и истакна дека таа го попречува економскиот напредок на земјата и го дестабилизира политичкиот и општествениот живот.