Амбасадорот на Република Грција во Република Македонија Харис Лалакос денеска ја посети општина Битола.
На прес – конференцијата амбасадорот Лалакос се осврна на досегашната погранична соработка на општините од двете држави, развојот на бизнисот и инвестициите во стопанството, а одговараше и на новинарски прашања.
Во врска со актуелната политичка состојба во Република Македонија и најавениот опозициски бојкот на локалните избори, амбасадорот Лалакос нагласи дека Грција е многу внимателна во врска со тоа да не создава мислење за домашните прашања во пријателска и соседна држава.
Амбасадорот на Република Грција во Република Македонија Харис Лалакос, и денеска изјави оти очекува решавање на спорот меѓу двете држави кој се води во Обединетите Нации.
– Се надевам дека спорот со името ќе се реши наскоро бидејќи грчката влада го има тоа официјално кажано дека е подготвена да се реши овој проблем. Ние веруваме оти соработката која постои меѓу двете земји во повеќе сектори може да биде вистински потенцијал што го имаме и прифатлива опција што ќе го донесе очекуваното решение за спорот, истакна Лалакос.