Австралискиот министер за емиграција Брендон О’Конор демантирал дека промовира признавање на Македонија под уставното име, јавија некои грчки медиуми.
Претседателот на Обединетата македонска дијаспора (ОМД) Мето Коловски, на почетокот од неделава во Брисел изјави дека О’Конор неодамна се сретнал со директорот на огранокот на ОМД во Мелбурн, професорот Ордан Андреевски при што рекол дека „сака да ја види нашата земја да биде признаена под уставното име од страна Австралија и вети дека ќе лобира кај Владата на премиерката Џулија Гилард за Македонија повеќе да се испочитува“.
Грчки „Капитал“ јавува дека О’Конор во изјава за „Неос Космос“, кој е медиум на Грците во Австралија, ја потврдил средбата со претставниците на македонската дијаспора, но „категорично ги демантирал медиумските извештаи во Македонија дека поддржува Австралија да ја признае Македонија под уставното име“. О’Конор, наводно, рекол дека неговата изјава била погрешно пренесена и истакнал дека ги поддржува преговорите за името што се водат под покровителство на ОН.