Во рамки на проектот финансиран од ЕУ за „Понатамошна институционална надградба и градење на капацитетите на полицијата во областа на граничното управување, работата на полицијата со заедницата и борбата против организираниот криминал“, во Центарот за обука во Идризово, се одржа интензивна обука за анализа на ризици во сферата на граничната контрола, како и за новиот концепт за управување со ризици.
Целта на проектот е да спроведе квалитетни обуки за гранично управување според востановените стандарди на ЕУ. Како што денеска соопштија координаторите на проектот, обуките се спроведени од страна на искусните професионалци и инструктори, Дарјо Цизел од Словенија и Гидриус Стрикулис од Литванија, и двајцата со повеќе од 10 години искуство во сферата на анализа на ризици во граничното управување и контрола.
Вкупно 12 полициски службеници од Гранична полиција, од централно и регионално ниво, мобилните едници на Граничната полиција, од Националниот координативен центар за гранично управување и Секторот за криминалистичко разузнавање и анализа, беа обучени да станат обучувачи за анализа на ризици и управување со ризици.
Во текот на оваа работна недела ќе се одржуваат каскадни обуки во четирите регионални центри на Граничната полиција – во Скопје, Охрид, Кавадарци и Делчево, кои ќе бидат спроведени од страна на обучените полицајци, под водство и со поддршка на меѓународните експерти. Како што е најавено, во иднина ќе се организираат и редовни обуки за граничните полицајци на работното место.