Граѓаните може да добијат и петнаесеткратна отштета ако не им стигне прoизводот што го купиле он-лајн, но таквиот случај ретко го пријавуваат зашто процедурите за поплаки се долготрајни и комплицирани, рече денеска директорот на Агенцијата за пошти Влатко Атанасоски.
Тој воедно апелира да се купува на интернет само од сертифицирани продавачи и притоа особено да се води сметка дали поштенскиот оператор што треба да ја достави пратката е лиценциран.
– Бројот на претставки е мал не зашто нема проблеми или зашто услугата е квалитетна, туку зашто процедурите се бавни, застарени и комплицирани. Ако интернет пратката не ја добиете, прво се обраќате до доставувачот (поштенскиот оператор), кој има рок од 30 дена да одговори што е многу долго време, и тоа ќе бараме да се скрати со законските измени. Во случај да не сте задоволни од одговорот, Агенцијата за пошти е второстепеното тело што ја утврдува одговорноста на поштенскиот оператор и носи решенија за надомест на штета, објасни директорот.