Индискиот милијардер Субрата Рој не се виде со градоначалникот на Охрид, Александар Петрески, при неговата посета денеска на Охрид. Власта и овој пат не го покани таткото на градот исто како што се случи и при посетата на бизнис делегацијата од Катар пред еден месец.
Милијардерот Рој и претставници од неговата компанија „Сахара Индија Паривар“ направија кратка обиколка на Охрид, а ручаа во манастирскиот комплекс Свети Наум. Помина и низ локацијата предвидена за изградба на туристичката развојна зона во Охрид. Претохдно тие беа во посета и на Дојран.
Градоначалникот на Охрид Александар Петрески за А1 кажа дека резултатот од сето ова ќе биде сведен на нула.
„Од протоколот никој не побара средба со мене како и во претходниот случај. Затоа резултатот ќе им биде сведен на нула како и претходно. Не знаат, а не ги викаат тие што знаат. Да беше во Босилево или Василево сигурно ќе го викнеа градоначалникот“, рече Петрески.
Во владината делегација која му правеше друштво на Рој беа министрите за финансии и транспорт и врски, Зоран Ставревски и Миле Јанакиевски.
Владиниот портпарол Мартин Мартиновски за А1 кажа дека генерално идејата било Индиецот да се запознае со потенцијалите за инвестирање во Македонија, конкретно во Охрид и Дојран и со можностите кои ги нудат предвидените развојни туристички зони, и оти генерално не било предвидено средба со градоначлниците. Мартиновски не знаеше дали во Дојран, во делегацијата бил и градоначалникот на таа општина.