Градоначалникот на општина Дебар, Хекуран Дука, вели дека подготвени ја чекаат одлуката на Владата која денес треба да одлучи дали градот ќе биде ставен во карантин поради петте случаи на заразени со коронавирус, а можноста за карантин се разгледува и за Центар Жупа од каде има двајца заразени. Градоначалникот Дука вели дека состојбата во Дебар и во Центар Жупа е алармантна.
„Добро е да се прогласи карантин. Седум случаи на заразени се многу за една држава, а не, пак, за еден град. Не можам да кажам дека нема паника кај граѓаните, има, но ги почитуваме препораките од Владата. Седиме изолирани по дома, со семејствата. Граѓаните ја сфаќаат сериозноста на ситуацијата и соработуваат. Ние направивме сè што е до човечкиот фактор да се направи за заштита од вирусот, за понатаму не знаеме“, вели градоначалникот Дука за „А1он“.
Тој извести дека во Дебар централната и локалната власт се обединиле и заеднички преземаат мерки. Како локална власт тие формирале Совет за итни случаи, направиле дезинфекција на улиците, а ќе се прави и на сите јавни простори. Многу фризерски салони, интернет-кафулиња и ресторани самоиницијативно прекинале со работа по препораките да го скратат работното време.
Владата попладнево треба да донесе одлука дали Дебар и Центар Жупа ќе бидат ставени под карантин откако го задолжи Министерството за здравство да испрати медициснки екипи со епидемиолог и инфектолог кои до крајот на денов треба да достават извештај за состојбата.