Градоначалникот на Дебар, Хекуран Дука, кој раководи и со Општинскиот оперативен штаб за справување со коронавирусот, вели дека во изминативе четири дена од земени 22 брисеви за дијагностицирање на вирусот, резултат има само за два. Во градот и натаму трае кризната состојба која ја прогласи Владата.
„Од 22 брисеви за тестови земени од среда па до сега, имаме резултат само за два и тие се негативни. Безбедносната состојба во градот е добра. Во домашна изолација имаме помал број на жители, односно 98 лица. Барањата на транспортните фирми кои барале да вршат транспорт на стоки е одбиено од Владата, тие ќе мора да почекаат до 13 април, кога Дебар ќе се ослободи од карантинот“, рече Дука.
Тој посочи дека он-лајн наставата на училиштата почнала да се спроведува и покрај недостатоците, кои според него, се присутни.
„Епидемијата уште не е завршена. Треба да ги почитуваме мерките на Владата, а тоа е да седиме дома, да бидеме солидарни еден кон друг, да имаме надеж дека сме на крајот од справувањето со епидемијата“, додаде Дука.