Актуелните случувања во општина Карпош и предизвиците со кои се соочува локалната самоуправа беа темите за кои денеска разговараа градоначалникот Стефан Богоев и унгарскиот амбасадор во Македонија Ласло Дукс.
На средбата, како што информира општина Карпош, амбасадорот Дукс ги претстави особеностите на локалната самоуправа на Унгарија и организираноста на главниот град, Будимпешта.
Амбасадорот Дукс напомена дека може да се иницира вмрежување и соработка меѓу бизнис заедницата од Карпош со бизнис секторот од некоја од општините во Унгарија.
Богоев посочи дека Карпош има и индустриска зона (Момин Поток), каде функционираат повеќе компании што може да се потенцијални партнери за соработка со унгарски инвеститори.
Дукс и Богоев разговарале и за унапредување на соработката во областа на културата, за вклучување на уметници од Унгарија во програмата на „Карпошовото културно лето“, кое се организира во втората половина на август.